| 515-0009 | — | 1452/1453 | — | I. Отъ Іоны, Митрополита Кіевьскаго и всея Руси, на Вятку и въ всю Вятъскую землю, воеводамъ земьскымъ Якову Пугвину и Оникею и... |
| | | |
| — | 1452/1453 | — | I. Отъ Іоны, Митрополита Кіевьскаго и всея Руси, на Вятку и въ всю Вятъскую землю, воеводамъ земьскымъ Якову Пугвину и Оникею и Юрью Алексѣевымъ Мышкина, и всѣмъ ватаманомъ, и подвойскымъ, и бояромъ, и купцемъ, и житьимъ людемъ, и всему нарицающемуся именемъ христіяньству тамошнія земля. Не вѣмы убо, како васъ нарещи: зоветесь именемъ христіяне, а живете дѣлающе злая горше нечестивыхъ, ни по христьяньству, ни по крестному цѣлованью, ни по божествьному писанію православныя истинныя христіяньскыя вѣры; святую сборную апостольскую церковь Рускыя митрополія обидите и законы церковные старые разоряете, а зався своему Господарю Великому Князю грубите и приставаете къ его недругу, и издавна, и съ поганьствомъ съединяющесь, и съ отлученнымъ отъ Божья церкве съ Княземъ Дмитріемъ съ Шемякею приходили есте многожды на Великого Князя вотчину, на Устюгъ, на Вологду, на Галичь, а черезъ крестное цѣлованье, цѣловавъ животворящей крестъ у князя у Дмитрія Ивановича у Ряполовьского, у Глѣба у Семенова трижды крестъ цѣловавъ, у Олександра у Мякинина двожды крестъ цѣловавъ, на Великого Князя добро, да то крестное цѣлованье забывъ, да зався измѣняюще, и христіяньство губите, и съ тѣми христіяньскыми губители и сами собою вотчину его воюете безпрестанно, христіяньство губите убійствомъ и полономъ и грабленіемъ, и церкви Божьей разоряете и грабите вся церковная священная приходія, кузнь и книгы и колоколы, и вся творите злая и богомерьзская дѣла, якоже поганіи. И нынѣ ново, сими часы, воевали есте Великого Князя вотчину, Сысолу и Вымъ и Вычегду, да людей есте православного христіяньства много перемучили, переморили, а иныхъ въ воду пометали, а иныхъ въ избы и въ хоромы насаживая, мужей, старцевъ и малыхъ дѣтокъ, безчислено пожигали, а инымъ очи выжигали, а иныхъ младенцовъ на колъ сажая умертвяли, подобяся (с. 491) злочестивому губителю и христіяномъ убійцѣ Ироду; а полону есте взяли болѣ полуторы тысячи душь, да которой нынѣ себѣ держите, а иныхъ въ поганьство продаете и въ дары даете; да отъ того отъ своего злаго дѣла не престанете, а своему Господарю Великому Князю зався грубите, а челомъ ему за свою грубость не бьете. Но какъ Богъ, своимъ милосердіемъ, положилъ на сердцѣ Великому Господарю, Великому Князю, васъ еще жаловалъ, а и нашего смиренія послушалъ, какъ есмь его богомолецъ о васъ молилъ его, съ многыми слезами, и съ молбою, и съ благословеніемъ, по своему святительскому долгу: и Великый Господарь, Великый Князь и до сѣхъ мѣстъ вамъ терпѣлъ, васъ не казнилъ, ожидая отъ васъ вашего челобитья и покаянія, отъ злаго вашего дѣла престатья; ино отъ васъ такы нѣтъ управленія. И язъ, его богомолецъ, уже то конечное, послалъ есмь къ вамъ сего своего старца, Кинешемскаго игумена Нафона, съ сею своею управою и кроткою грамотою и съ своими рѣчми, васъ жалуя, чтобы есте отъ своего злаго дѣла престали, а своими бы есте душами не погыбли и нынѣ временно, а въ будущемъ ономъ вѣцѣ не были есте въ безконечной оной муцѣ: церковь бы есте Божію держали по христіяньству по старинѣ честно, а Господарю бы есте своему, а нашему сыну Великому Князю, за свою злую створенную къ нему грубость, челомъ добили; а грабежи бы есте всѣ церковьные отдавали, и полонъ бы есте весь отпущали безхитростно, а по сы бы есте часы отъ своего злаго дѣла престали. И послушаите, ино еще на васъ будетъ милость Божія и вашего смиренія благословеніе, а Великого Господаря Великого Князя жалованье, по вашему къ нему исправленію; а не послушаете насъ, а своему Господарю Великому Князю челомъ не побіете и къ нему не исправитесь въ всемъ безъ хитрости, ино не будетъ на васъ милость Божія, и Пречистыя его Богоматере и всѣхъ Святыхъ молитвы, и нашего благословенія, и нынѣ и въ вся безконечные вѣкы; а та кровь христіяньская вамъ отольется, то вамъ все отъ себя пріидетъ. А рѣчьми своими, съ симъ своимъ старцемъ, тоже семь къ вамъ приказалъ. Писанъ . . . . . . . |
| | | II. Отъ Іоны, Митрополита Кіевьскаго и всея Руси, на Вятку и въ всѣ Вятцкые городы и въ волости, и въ погосты, и въ села, и въ вся Вятцкая мѣста, игуменомъ, и попомъ, и дьякономъ, и черноризьцемъ, и всему нарицающемуся тамошнему священьству. Не вѣмы убо, како васъ нарицати священникы, отъ кого имѣете поставленіе и рукоположеніе, и духовное наказаніе, и поученіе божественыхъ и священныхъ правилъ святыхъ Апостолъ н святыхъ богоносныхъ Отець и всего божественнаго писанія православныя христіяньскыя истинныя вѣры? Еуангельскыхъ и Апостольскыхъ и Отеческыхъ поученіи сами не требуете, и живуще небрежливо, и сами идете въ погыбель и въ будущую оную вѣчную и въ безконечную муку; зовущися священницы и учителіе христіяньстіи, а преже всѣхъ о своихъ душахъ нерадяще и ни священьства своего не знающе, ни того не поминающе реченнаго глагола, какову подобаетъ священнику быти, якоже речеся: «идѣже желаютъ Ангели приникнути у страшнаго престола Христова предстояще». И како мы непотребни о томъ не потрепещемъ и вмѣняемъ то себѣ запросто? а имамы о томъ осужденіе пріяти вѣчно. Да еще души христіяньскыя препущаемъ въ вѣчную муку, не наказающе ихъ, ни отъ злаго житія не уймающе, якоже слышимъ: како тамошніи ваши духовніи дѣти незаконно живутъ, поимающе женъ до пяти, до шти, до седми, а вы ихъ благословляите и приношеніе отъ нихъ пріемлете, что есть Богу мерзко; и како они животворящаго креста цѣлованье (с. 492) измѣняютъ, и съ отлученными отъ Божія церкви и съ погаными и съ нечестивыми человѣкы съвъкупляются, и православное христіяньство губятъ убійствомъ и грабленіемъ и всѣми злыми дѣлы неизъчетно, и святыя Божія церкви разоряютъ и грабятъ, а зовущесь христіане, а творяще злая дѣла горшѣе поганыхъ. И отъ сего времени зовущеися священници, игумени, попы и дьякони, и черньци, аще не познаете своего Святителя и настоятеля, и не покаитесь отъ своихъ злыхъ прежде съдѣянныхъ и горкыхъ дѣлъ, а дѣтей своихъ духовныхъ не имете наказати и отъ лукавыхъ дѣлъ не имете уймати: и наше смиреніе, по Божью повелѣнію и по божественыхъ и священныхъ правилъ запрещенію, имѣетъ васъ несвященникы, но и тягость духовную церковную на васъ и неблагословеніе накладаемъ, доколѣ пріидете въ чювьство и въ чистое къ Богу и къ нашему смиренію истинное покаяніе. А тѣ ваши духовные дѣти, зовущеся христіяне, а поганая дѣла дѣлающе, тако же, аще ся не покають, а отъ своихъ злыхъ прежнихъ дѣлъ не престанутъ, ни Господарю своему Великому Князю челомъ не добьютъ, а грабежовъ церковныхъ всѣхъ не отдадутъ, а полону христіяньскыхъ душь безхитростно не отпустятъ всѣхъ: и наше смиреніе, и съ всѣмъ нашимъ священьствомъ, имѣемъ ихъ неблагословеныхъ и отъ Божія церкви, отъ православного христіяньства, отлученныхъ временно же и будуще, дондеже къ Богу чисто покаются и исправятся въ всемъ безъ лукавьства. |
| | | |
| [-] | 490 — 492 | Акты исторические, Т. 1, 1841 |  |
