| 515-0013 | — | 1456/1457 | — | Благословеніе Іоны, Митрополита Кіевьского и всеа Руси, о святѣмъ Дусѣ сыновомъ нашего смиренія, бояромъ и воеводамъ и ватаманомъ... |
| | | |
| — | 1456/1457 | — | Благословеніе Іоны, Митрополита Кіевьского и всеа Руси, о святѣмъ Дусѣ сыновомъ нашего смиренія, бояромъ и воеводамъ и ватаманомъ и всѣмъ купно истиннымъ православнымъ христіяномъ, еже въ распятаго насъ ради Господа Іисуса Христа Бога вѣрующимъ. Се слышаніе мое, сыново, что деи тамъ, въ вотчинѣ сына моего Великого Князя, у васъ на Вяткѣ, чинится Богу съпротивныхъ и ненавистныхъ дѣлъ велми много, къ крестьяньской по-гибели: многые деи христіане съ женами незаконно въ невѣнчаніи живутъ, а иніи деи вѣнчаются, но незаконно, четвертымъ и пятымъ съвкупленіемъ, а иніи шестымъ и седмымъ, олинь и до десятого; а духовніи ихъ отцы, игумени и попы, божественыхъ писаній неискусни суще, божественыхъ и священныхъ правилъ невѣдуще, тѣми бого мерзкими бракы ихъ съвкупляютъ, а къ нашему смиренію, нашего ради благословенія и наказанія, и паче своего ради спасенія, и за небреженіе дѣтей своихъ духовныхъ и за лѣность, не могутъ къ намъ единого которого своего брата священника прислати, своея же дѣля душевныя ползы и врученныя имъ Христовы паствы, суще яко каменосердечніи и ожесточеніи: таковы, сынове, будуще, именующесь священницы и христіаньстіи правители, и не будетъ то, но губители душамъ человѣческымъ, а не пастуси. А нынѣ слышахомъ, что недостойни суще великого Божія священьства, да оболкшеся въ безстудіе, священьствуютъ, и таковіи суть горши еретиковъ: иніи деи отъ мірьскыхъ пріимше ангелскый образъ, чернечество, да потомъ оставляютъ, да и женятся, а тіи недостойни священници ихъ на то благословляютъ. И о сихъ, сынове, Богу вѣдущу, по Пророку, «исчезосте ми очи отъ слезъ», занеже коль та суть мерзка и супротивна Богу. И того ради нынѣ вмалѣ пишу вамъ, своимъ дѣтемъ, по своему святительскому долгу и по глаголющей Христовѣ заповѣ-ди, Пророкомъ Іезекѣилемъ къ намъ глаголющей: «сыне человѣчь, блюстителя дахъ тя дому Израилеву, и слыши отъ мене слово и запрети имъ: внегда глаголати ми безаконному, да умреши, и не повѣси ему, та кровь его отъ твоея рукы взыщу; аще ли засвидѣтелствуеши ему, и не обратится отъ беззаконія своего, той самъ въ грѣсѣ своемъ умретъ, а ты душу свою избавити». И того ради, сынове, въспоминаю вамъ и пишу съ горькымъ рыданіемъ, избавляя свою единородную безсмертную душу отъ осуженія отъ Бога и неизмолимыхъ мукъ; и не въспомянути ми убо о сихъ вашей любви, и Творецъ мой Христосъ Владыка отъ моея рукы того взыщетъ. Понеже бо се уже яко конецъ лѣтомъ приспѣ, и Судія възданіемъ ждетъ насъ, и того ради молю вы покаянія чистаго силу показати; и благословляю васъ, о святѣмъ Дусѣ сынове мои, бояре и воеводы и ватаманы и (с. 499) вси православные христіяне тое земли, чтобы есте съ моимъ десятилникомъ о томъ великое смотрѣніе имѣли и за лихого супротивника Божью закону и нашему великому православію тому нашему десятилнику не стояли: занеже онъ, по наказанію нашему, что которое дѣло мощно, съ вами тамо управитъ; а чего не мощно будетъ ему тамо управити, и онъ къ мнѣ отпишетъ, или, какъ Богъ дастъ, самъ у насъ будетъ, и онъ намъ скажетъ. А вы бы, сынове, тѣхъ великыхъ и тяжкыхъ грѣховъ на себе не имали, помнящи Христовыхъ устъ слово, глаголющее, «еже слѣпець слѣпца ведый оба въ яму впадестася»: за то Господь Богъ и здѣся таковымъ и тѣлеснѣ того не заложитъ, паче душевнѣ предастъ горькой безконечной муцѣ въ страшный великый день неизмолимаго суда. И о томъ бы есте, сынове, колико мощно, съ великымъ смотрѣніемъ, отъ таковыхъ безаконниковъ удаляли себе, въ всемъ будуще именующесь истинніи и православніи христіяне; и того ради, сынове, ото Вседержителя Бога и отъ всѣхъ земль благопрославлени будете, а паче въ небесномъ безконечномъ царствіи, егоже и молюся получити вамъ въ без-конечныи вѣкы. Вамъ же, Господніи священници, также вмалѣ глаголю: вѣсте ли, въ каковый убо санъ достигла есте, и како порученно есть вамъ съ спасеніемъ блюсти Христово стадо, егоже искупи честною своею кровію? И о семъ, какъ слышится здѣсе у насъ, что о собѣ и о вашей врученной отъ Бога паствѣ смотрѣнія и попеченія не имѣете никакова, забывше Вышняго страхъ. И слышите, чада моя, пятдесятъ осмаго правила святыхъ Отець, какимъ запрещеніемъ глаголетъ сице: «яко епископъ, или презвитеръ, нерадяй о причтѣ и о людехъ, не наказуяй тѣхъ съ прилѣжаніемъ благочестью, да отлучится, пребываяй же въ лѣности да извержется»; — и о семъ молю вы смотрѣніе великое имѣти, преже о себѣ, такоже и о Христовѣ паствѣ. Пишетъ бо великый Деонисіе Арепагитьстій: «достоитъ, рече, быти Господню священику чисту, яко свѣту быти, и тако просвѣщати, занеже скверна убо сквернитъ, а чистота убо очищаетъ». Того ради убо молю вы, Господни священници, обозрѣти себе всяко и съдрогнутись, яко отъ сна въспрянутися, и отъ безчѣннаго пьяньства себе въздержати вамъ, еже есть не на здравіе души и тѣлу, но паче на погубленіе души и на отгнаніе дѣйствуемой благодати и дару вамъ Святого Духа. И таже смотряща и безсмертнаго тѣла и честныя Владычня крови въ которые устна есть вхожденіе: иже бо коими тако мерзостныма и скверныма устнама къ тѣмъ безсмертнымъ и животворящимъ тайнамъ приступити дерзаете и кого спріобщити смѣете, яко трава сущи прикоснутись огню; и сего ради смотрите, кого причащаете безсмертнымъ Христовымъ тайнамъ, понеже бо не достоитъ предати Божія тѣла и честныя Владычняя крови въ уста скверны и мерзостны: ибо, по Апостолу, «таковый себѣ судъ ястъ и пьетъ». И сего ради, чада моя, съ своимъ благословеніемъ и моленіемъ пишу вамъ, дабы есте обозрѣли себе всяческы и врученныхъ вамъ отъ Бога душъ человѣческыхъ, прибѣгающе къ святымъ Божіимъ церквамъ съ съкрушеніемъ сердца, безъ лѣности, и своя духовная чада ото всѣхъ супротивныхъ Богу наказующе и отводяще, а поминая о всемъ часъ смертный и неизмолимыя безконечныя оны будущія мукы, въ пріидущій онъ страшный день великого суда Божія. И имете ли, сынове, такъ съ усердіемъ жити и супротивья еже къ Богу оставити, а не чинити, и надѣяніе имѣю на великое Божіе человѣколюбіе: и того ради землю вашу всѣмъ благымъ произобилуетъ, а самихъ васъ небеснаго безконечнаго своего царьствія не отлучитъ и наслѣдьствіе даруетъ, и съ вашими духовными чады, въ безконечные вѣкы, (с. 500) съ всѣми купно истинными православными христіяны. Да есть мое благословеніе и къ Богу незабытная молитва о тѣлесномъ вашемъ здравіѣ, а паче о духовнѣмъ. А писана на Москвѣ. |
| | | |
| [-] | 498 — 500 | Акты исторические, Т. 1, 1841 |  |
